أكّد الفنان أمير صلاح الدين، أنه تعرّض لأكثر من عملية نصب من قبل القائمين على بعض الأعمال الفنية التي تُعرض خلال الموسم الدرامي الحالي.
وقال أمير في بيان صحفي عبر صفحته على موقع التواصل الاجتماعي فيس بوك :" - مسلسل رقم ١ .. مضيت العقد بنصف أجري .. وماخدتش دفعة تعاقد .. ! ذاكرت كل الحلقات اللي معايا ، وبعد ٣ شهور .. دوري كله إتشال - لأسباب واهية .. تدين المؤلف والمخرج والمنتج الفني ،، وطبعاً البطل".
وأضاف :" مسلسل رقم ٢ - إعتذرت عنه ٣ مرات متتالية بسبب ضعف المقابل المادي ، عدم إكتمال السيناريو ولا ملامح الشخصية ، وافقت بعد وساطات من بعض الأصدقاء - برضه بنص أجري - صورت في ظروف قاسية ( نهار وليل خارجي - صيف - شتاء - بلبس فرعوني شبه عاري ) ، ولكن مش مهم هذه هي متاعب المهنة . قبل عرض المسلسل باسبوعين ، تم إيقافه ووقف مستحقات العاملين بقرار من فوق - مش عارف يعني إيه من فوق –".
وتابع صلاح الدين :"مسلسل رقم ٣ ( شركة انتاج تانية )- كلمني المخرج الشاب على شخصية صغيرة - وافقت -إستغرب المخرج اني وافقت رغم صغر حجم الدور .. وبعد تقريباً شهر ، جابوا واحد تاني .. بدون علمي .. ولا المخرج الشاب المتحمس ولا المنتج الفني الكبير إعتذر ..! "
وواصل :"- مسلسل رقم ٤ .. بعد فترة إنقطاع رجعت أشتغل تاني مع مخرجي وممثلي المفضلين .. لكن شرط غريب جداً .. لأن المسلسل بقى ١٥ حلقة مش ٣٠ ، فأنا برضه هاخد نص أجري لأنه عدد أيام تصوير أقل ، واللي حصل غير كده خالص .. عدد الايام زي ايام ال ٣٠ حلقة ، وأكتر ".
واختتم أمير صلاح الدين بقوله :" ملحوظة : مش مسموح للممثلين الإحتفاظ بنسخة من العقد . وده مخالف لأعراف المهنة ، والخلاصة : أنا إتنصب عليا السنة دي .. آخذ حقي من مين .؟!!!، الناس خايفة تتكلم بس أنا مش هاسكت .. المنظومة فاسدة ولازم تنضف وبسرعة .. أخركم معايا رمضان ٢٠٢١ ".
